[MONITUM.]
Sanctum nostrum varia scripsisse, quae aut perierunt aut latent, colligo ex Andrea Januensi in Vita cap. 18, ubi sic habet: Collegit plurima sanctorum Patrum capitula, dicta, doctrinam et exhortationes, ex quibus adversus Simoniam universos instruebat et armabat, quatenus illam non solum refugere, verum etiam possent impugnare. Idem testatur Hieronymus Radiolensis libro De vita solit. cap. 17, his verbis: Joannes noster tum scito et gravi sermone, tum epistolis per amplam Italiam conscriptis, schismaticos, infideles, et pecunia corruptos reprehendebat et acriter damnabat et pari modo domi forisque insectabatur. Quin imo Eudoxius Locatellus, apud Franchium lib. VII, pag. 165, citatus, asserit gloriosum Patrem S. Joannem divina virtute subito tantam acquivisse scientiam, ut doctissimum sanctissimumque latinarum epistolarum librum composuerit. Nobis jam tantum duae supersunt epistolae. Prima ad Herimannum Volatrensem, id est Volaterranum episcopum, quae a B. Attone brevitatis ergo omissa refertur a B. Andrea in Vita num. 74. Altera, quam S. Pater jam morti propinquus de fraterna charitate dictavit, habetur apud eumdem Andream num. 112. Haec pauca de illius scriptis; nunc ad ejus preces pergimus.
Anno 1698 D. Germanus Ruini sacrista Vallumbrosanus dedit ad Papebrochium litteras, quas hic praemitto, rescissis laudibus, quibus nos immerentes cumulat. Itaque in earum parte, quae ad rem praesentem spectat, ita loquitur: Quoniam mei muneris est antiqua sanctorum nostri ordinis Vallis Umbrosae gesta inquirere, et diligenter investigare ad Dei laudem ejusque servorum, operae pretium duxi, accedente insuper beneplacito reverendissimi P. Generalis D. Venantii Simi Tomani, circa vetustissimum Manuale manuscriptum, quo usus est S. Joannes Gualbertus abbas institutor, ejusque beati discipuli, paternitati tuae admodum reverendae aliquid sincere scribere. Hoc igitur sacrum Manuale, quod asservatur inter alias reliquias in sanctuario Vallis Umbrosae, uti videre est, etiam vidit R. P. Mabilio monachus S. Benedicti, ut apparet ex suo Itinere Italico, fol. 183, continet plures ac pias orationes et documenta, quae licet sint forsan et aliorum sanctorum Patrum, tamen quia historice tenemus illas recitasse S. Joannem Gualbertum et dicta dedisse etiam documenta [0971] suis sociis, ut ex nostris historicis apparet, ideo haec sua eximia gesta, ne in umbris amplius delitescant, rogamus suppliciter, ut hoc breve spirituale exercitium orationum a me sincere collectum theologi eximiae societatis tuae in lucem istic edant ac benigne ad Acta Sanctorum inserant sive in annotationibus ad diem 12 Julii; de quo et gratias agemus singularissimas.
Libenter humanissimi viri petitioni annuimus, et totius ordinis, quem intime veneramur, desiderio satisfacturi hasce preces et documenta hic subjungimus. Igitur D. Germani Ruini ecgraphum sic habet.
[0971A] Manual. pag. 1.
Imitemur sanctam Ecclesiam, cujus et membra sumus.
Manual. pag. 1.
Cum a somno evigilas, crucis signum + in labiis impinge.
Manual. pag. 1.
Ego te toto corde et ore confiteor et adoro Patrem et Filium et Spiritum sanctum, trinum in personis et unum in substantia.
Fol. 1.
Oratio Dominicalis. Credo.
Ex Breviculo S. Joan. Gualberti ms.
Ego Joannes credo et confiteor fidem, quam sancti apostoli praedicaverunt, et sancti Patres in quatuor [0971B] conciliis confirmaverunt.
Ex Breviar. S. Joan. Gualberti ms.
Invoco Patrem et Filium et Spiritum sanctum, ut sit super me signum crucis et defendat me a malis operibus. Signaculum sanctae crucis sit super me diebus ac noctibus.
Ex Manual. fol. 2.
Gratias tibi ago, infinita misericordia, Domine Deus omnipotens, qui me per aquam sacri baptismatis et renovationem sancti Spiritus ab originalibus vinculis expedisti. Gratias tibi ago, qui me in te credere recte fecisti, et tuorum me fidelium numero sociare dignatus es.
Ex Manual. fol. 2.
Domine Deus omnipotens, aeterne et ineffabilis [0971C] sine fine atque initio, quem in unum in Trinitate et trinum in unitate confitemur, te solum adoro, te laudo, te benedico, teque glorifico, tibique, misericors et clemens, gratias refero, qui me exutum nocte perfidiae et erroris, participem fieri tribuisti gratiae tuae. Perfice, quaeso, Domine, coeptum in me opus misericordiae tuae. Dona mihi tempus cogitare, loqui et agere quae placita sunt tibi, et gratuita me ubique pietate custodiens, fac me indignum et miserum ad tuam pervenire visionem. Amen.
Ex Manual. fol. 11.
Gratias tibi ago, omnipotens Pater, qui me dignatus es in hac nocte custodire. Deprecor clementiam tuam, piissime Domine, ut concedas mihi diem venturum [0971D] sic peragere in tuo sancto servitio, in humilitate et discretione, qualiter tibi complaceat servitus nostra; et praesta mihi hodie cum summa patientia tibi gratum exhibere servitium.
ORATIONES DIVERSAE.
PRO SENSUUM CUSTODIA ORATIO.
Ex Manual. fol. 11.
Mecum esto, [Domine] Sabaoth, mane cum surrexero; [0972A] intende in me et guberna actus meos et verba mea et cogitationes meas. Custodi pedes meos, ne circumeant domum otiosi, sed stent in oratione. Custodi manus meas; sint purae, mundae et elevatae sine ira et disputatione. Custodi os meum, ne loquatur vana, ne fabuletur saecularia, ne detraham proximo meo, ne invitem alios ad vanum eloquium, sed semper sim promptus ad laudem, tardus ad iram. Custodi aures meas, ne audiant detractionem, nec mendacium, nec verbum otiosum; sed aperiantur quotidie ad audiendum verbum Dei, ut tota die transeam in tua voluntate. Custodi oculos meos, ne videant vanitatem. Dona mihi timorem tuum, Domine, cordis compunctionem, mentis humilitatem, conscientiae puritatem, ut coelum aspiciam, [0972B] terram despiciam, peccata odiam, justitiamque diligam in saecula saeculorum. Amen.
ORATIO AD JESUM.
Ex Manual. fol. 12.
Pie exaudibilis Domine Jesu Christe, exaudi me indignissimum peccatorem per interventum et meritum beatae et gloriosae semper Virginis Mariae Genitricis tuae et omnium civium supernorum, Ecclesiae tuae catholicae fidem auge. Pacem tribue Papae N. et omni huic Congregationi, consanguineis quoque nostris et principibus Christianis atque tua mihi charitate conjunctis. Etiam sua nobis munera largientibus, persequentibus et calumniantibus nos, omnibus, qui pro nobis implorant nomen sanctum [0972C] tuum, vel qui pro se nos miseros apud tuam clementiam supplicare voluerunt; nobis quoque peccatoribus remissionem et indulgentiam omnium tribue peccatorum. Infirmis salutem, lapsis reparationem, navigantibus et iter agentibus, iter prosperum et salutis portum; afflictis et tribulatis gaudium; oppressis relevationem; captivis, vinctis et peregrinis absolutionem et ad patriam reversionem propitius concede.
ORATIO.
Ex Manual. fol. 18.
Universis gradibus, qui in fide sanctissimae Trinitatis in Ecclesia tua catholica communiter continentur, miserere, clementissime Deus. Propitiare omnibus in quibuscunque necessitatibus atque miseriis [0972D] constitutis, et universo populo tuo Christiano, quem pretioso sanguine redemisti.
ORATIO.
Ex Manual. fol. 30.
Reple corda nostra fide, spe et charitate, obedientia et humilitate atque patientia, et fac nostrum rectorem secundum cor tuum, ut faciat voluntatem tuam ad salutem suam et nostram. Amen.
ALIA ORATIO.
[0973A]
Fol. 18.
Tribue, Domine, quaesumus, omni sexui inuniversae aetati atque conditioni ordinis Christiani mandatorum tuorum custodiam et suorum omnium veniam delictorum et nobis miserere. Amen.
ALIAE QUAEDAM PIAE ORATIONES
ORATIO PRO CONTEMPLATIONE COELESTIS PATRIAE.
Ex Manual. fol. 4.
Admonet nos B. Apostolus dicens: Si consurrexistis cum Christo, quae sursum sunt quaerite, ubi Christus est in dextera Dei sedens; et iterum: Nostra autem conversatio in coelis est. Lugeamus in hac calamitoso itinere, quamdiu exsulamus a patria. Transcendamus contemplationis pennulis cuncta, [0973B] quae coeperunt ex tempore et cum tempore finiuntur, et ad illam totis desideriis patriam mente volitemus, ad quam in tempore pergitur, sed sine tempore vivitur. Ad accendenda igitur nostra desideria, hos quinque canamus spiritu et mente quotidie Psalmos: Sicut cervus desiderat ad fontes aquarum, ita desiderat, etc. Judica me, Deus, et discerne causam, etc. Te decet hymnus, etc. Quam dilecta tabernacula tua, Domine, virtutum, etc. Voce mea ad Dominum clamavi, etc.
Ex Manual. fol. 4.
Post orationem Dominicam isti psalmi sunt suppliciter decantandi: hi etiam in tribulatione mentem consolantur et sublevant: Usquequo, Domine, oblivisceris me in finem, etc. Deus, Deus meus, respice in [0973C] me, etc. Deus, in nomine tuo salvum me fac, etc. Miserere mei, Deus, quoniam conculcavit me homo, etc. Deus in adjutorium meum intende, etc. Eripe me, Domine, ab homine malo, etc. Domine Deus salutis meae, etc.
POST MODULATIONEM PSALMORUM ORATIO.
Ex Manual. fol. 32.
Liberator animarum et mundi Redemptor Jesu Christe, Domine Deus aeterne, Rex immortalis, supplico ego peccator immensam clementiam tuam ut per modulationem psalmorum, quos ego miser indignus cantavi, liberes animam meam de peccato et abstollas cor meum de malis et pravis et perfidis cogitationibus et auferas corpus meum a servitute peccati, et repellas a me carnales concupiscentias, [0973D] et eripias me de omni impedimento Sathanae et ministrorum ejus visibilium atque invisibilium et infidelium tuorum, qui quaerunt impedire animam meam.
ORATIO PRO DEFUNCTIS.
Ex Manual. fol. 20.
Ne reputes, piissime Deus, peccata quiescentium fratrum meorum, vel eorum, qui mihi conjuncti tua charitate exstiterunt, ut his, atque omnibus in tua fide defunctis digneris propitius aeternam concedere requiem. Amen.
IN TENTATIONE IMMUNDORUM SPIRITUUM CONSOLATIO.
Ex Manual. fol. 7.
Consolatur nos in tentationibus daemoniacis egregius [0974A] praedicator dicens: Fidelis autem Deus, qui non patietur vos tentari supra id quod potestis, sed faciet cum tentatione etiam exitum, ut possitis sustinere. Quo circa sciendum est, quia judicii occulti mensura est, et quando tentationis procella prosiliat, et quando quiescat. Certe, Evangelio attestante, diabolus nec manere in obsesso homine potuit nec minus invadere bruta animalia non jussus praesumpsit. Quando ergo sua sponte nocere factis ad Dei imaginem hominibus auderet? Cui si potestas summa licentiam non praeberet grassari, nec in porcos valeret ire. Nullo modo ambigendum est permissu aequissimi judicis in electos ad tempus diabolum tentandi accipere potestatem, sed misericorditer judex concedit, quod crudeliter hostis [0974B] cuperet. Hinc est quod fideli famulo de eodem Dominus dicit: Non quasi crudelis suscitabo cum. Hinc Esaias tentationibus fatigatam fidelem animam blandis consolationibus refovet, dicens: Dixit Dominus Deus tuus: Ad punctum in modico dereliqui te, et in miserationibus magnis congregabo te. Item ibi: Abscondi faciem meam parumper a te, et in misericordia sempiterna misertus sum tui.
Ex Manual. fol 7.
Cum ergo in tentationem ad tempus incidimus, priusquam in delectationis aut pravi consensus labamur voraginem, clamemus medullitus, clamemus valenter hos decantando psalmos: Usquequo, Domine, oblivisceris me in finem. Ps. Deus, Deus meus, respice [0974C] in me, quare me dereliquisti. Ps. Deus, in nomine tuo salvum me fac. Ps. Miserere mei, Deus, quoniam conculcavit me homo. Ps. Domine Deus salutis meae Ps. Deus in adjutorium meum intende. Ps. Eripe me, Domine, ab homine malo.
AD S. CRUCEM ORATIO.
Ex Manual. fol. 47.
Adesto familiae tuae, clemens et misericors Deus, ut in adversis et prosperis preces exaudias, et nefas adversariorum per auxilium S. crucis, quia in te passus est Salvator mundi, digneris conterere, ut portum salutis valeant apprehendere. Per Dominum nostrum Jesum Christum, etc.
Ex Breviar. ms. S. Joan. Gualberti prope finem.
[0974D] Invoco Patrem et Filium et Spiritum sanctum ut sit super me signum crucis et defendat me a malis operibus; signaculum S. crucis sit super me diebus ac noctibus.
Ex Manual. fol.?
Crucem tuam adoramus, Domine, et sanctam resurrectionem tuam laudamus et glorificamus: ecce enim propter crucem venit gaudium in universo mundo.
PRO CONSERVATIONE CONGREGATIONIS ORATIO.
Ex Manual. fol. 31.
Ne des, clementissime Deus, hanc congregationem in dispersionem, sed conserva eam propter nomen sanctum tuum.
ORATIO.
[0975A]
Ex Manual. fol. 3.
Exaudi me, clemens et benigne Deus, pro universis fidelibus tuis, qui nobis eleemosynas suas dederunt, nec aspicias, Domine, peccata mea, sed fidem illorum, qui nobis in fidem tui nominis largiti sunt bona temporalia: et tu, Deus, remunerator omnium bonorum, retribuere illis digneris pro parvis magna et pro terrenis promissa sempiterna, Salvator mundi, qui vivis et regnas in saecula saeculorum. Amen.
ORATIO.
Fol. 31 ibidem.
Miserere omnibus catholicis tam vivis quam defunctis, et aversos a via veritatis dignare ad te [0975B] convertere, ut te toto corde requirant. Et aeterna protectione omnes conserva, ut nullis tentationibus a te separentur. Et praesta ut mortuis prosit haec oratio servi tui ad emundationem delictorum seu levigamentum poenarum. Tu, Deus magne et terribilis, misericors et amator hominum, tu scis quidquid singulis expediat: obsecramus clementiam tuam, Domine, ut juxta voluntatem tuam fiat nobis omnibus tam vivis quam et fidelibus defunctis, Salvator mundi, qui vivis et regnas, etc.
ORATIO PRO GRATIARUM ACTIONE.
Ex Manual. fol. 2.
Gratias tibi ago, infinita misericordia, Domine Deus omnipotens, teque laudo et glorifico, qui me de aeternae mortis interitu, de poenis, et hujus carnis [0975C] cruciatibus, in quo affligi dignus sum, hactenus liberasti. Tibi ago laudes et gratias, qui me de multis mortibus, de multis opprobriis, calamitatibus et miseriis, de immanissimis diaboli laqueis, de immundis desideriis exemptum disruptis vinculis, quibus tenebar adstrictus, perducere dignatus es ad servitium tuum. Tibi ago laudes et gratias, qui me eripiens a jurgiorum procellis, das mihi servorum tuorum perfrui charitate. Quaeso, Domine Deus meus, qui mihi usque ad praesentem horam tuam misericordiam impendere dignatus es, dona mihi, toto corde, tota anima, totis viribus meis exquirere faciem tuam semper, et perduc me, misericors, ad tuam suavissimam visionem. Amen.
ORATIO AD B. VIRGINEM MARIAM.
[0975D] Ex Manual. fol. 27.
Te supplico, Virgo sancta Maria, Mater Christi immaculata, puerpera, stella maris splendida, regina coelorum digna, aula Dei munda, porta Christi conclusa, in mulieribus benedicta, super coelos exaltata, Genitrix Christi, apud Filium tuum Dominum pro peccatis meis intervenire digneris: nullus est enim in creaturis dignior te, quia ipse, qui creavit te, natus est, et perinde nullum libentius exaudit quam te. Sub tuis ergo visceribus confugio. Amen.
AD S. MICHAELEM ARCHANGELUM.
Ex Manual. fol. 27.
Obsecro te, gloriosissime Michael, princeps exercitus [0976A] angelorum, quem Jesus Dominus noster ideo voluit mortalibus manifestum fieri, ut quos ille de sub jugo daemoniacae servitutis, sanguinem suum fundendo eripuit, tu eos ab illius insidiis angelica potestate protegas et virtute orationis defendas: funde pro me quotidie preces tuas, ut donet mihi Dominus contra vulneratum superbum humilitatis fortissima arma, quibus et illi fortiter resistere valeam et Domino nostro suppliciter obedire, et societatem angelicae beatitudinis, quam ille superbiendo perdidit, dignis ego obediendo apprehendere valeam. Amen.
AD SANCTOS ANGELOS CUSTODES.
Fol. 13.
Adsit, quaeso, mihi beatorum angelorum tuorum [0976B] pia custodia, et praesta, ut apud te pro me indignissimo sanctorum tuorum agmina intercedant.
ALIA ORATIO.
Fol. 13
Angelum tuum sanctum nobis hic et ubique largire custodem et defensorem: mutuam discordantibus charitatem, infidelibus veram fidem, defunctis parentibus et omnibus in tua fide quiescentibus indulgentiam tribue delictorum.
AD APOSTOLOS CHRISTIQUE DISCIPULOS.
Fol. 29.
Omnes apostoli cum omnibus discipulis discipulabusque Domini mei Jesu Christi, orate pro me, ut abstrahat me Dominus a mundo, sicut abstraxit vos, et donet mihi sequi vestigia sua vel in extremo [0976C] agmine nostro. Amen.
AD CONFESSORES.
Fol. 30.
Obsecro vos, beatissimi confessores Christi atque doctores Cypriane, Basili, Gregori, Athanasi, Eusebi, Ambrosi, Augustine, Hieronyme, Leo, Germane, Isidore, dignamini intercedere pro me peccatore, ut concedat mihi Dominus servare quae docuistis, et in vestro me faciat consortio gratulari.
AD S. BENEDICTUM ABBATEM.
Fol. 29.
Obsecro te, beatissime Benedicte, dilecte Dei, intercede pro me servo tuo, et omni sancta hac tua congregatione et pro universis sub tuo magisterio militantibus, simul et pro omni populo Christiano, ut [0976D] purget Dominus cor et actus a cunctis vitiis. Tribuat mihi servare cuncta quae praecepit, et custodire sanctae regulae tramitem, quem me servaturum spopondi.
PRO BENEDICTIONE CELLARUM MONACHORUM ORATIONES.
Fol. 21.
Benedic, Domine, quaesumus, cellulam istam, ut qui in umbra alarum tuarum speramus, ab omnibus insidiis daemonum virtutis tuae potentia tueamur. Per Christum Dominum nostrum.
Fol. 21.
Huic cellulae, quaesumus, Domine, praesens adesto, ut caterva daemonum conterrita effugetur. Per Dominum nostrum Jesum Christum.
[0977A] Fol. 21.
Deus, quem nec spatia dilatant, nec brevitas locorum angustat, hanc cellulam, quaesumus, praesentiae tuae luce perfunde, ut tenebrarum auctor confusus abscedat. Per Dominum nostrum Jesum Christum.
PRO SILENTIO.
Ex Manual. fol. 12.
Scriptum est, affirmante Apostolo, quia vita et mors in manu linguae. Et iterum: Linguam nullus hominum domare potest. Quod ergo domare non potest purus homo, rogemus ut domet Deus et homo. Ergo ad obtinendam virtutem discreti silentii, supplici devotione hos canamus Domino psalmos: Verba mea auribus percipe, Domine. Ps. Dixi: Custodiam [0977B] vias meas, ut non delinquam in lingua mea. Ps. Domine clamavi ad te, exaudi me, etc.
ORATIO AD PATREM.
Ex Manual. fol. 3.
Deus ineffabilis institutor omnium rerum, et Domini nostri Jesu Christi Pater, qui eumdem dilectum Filium de sinu tuo misisti ad publicum nostrum suscipere nostram vitam, ut nobis donaret suam, essetque perfectus Deus ex te Patre, et perfectus homo ex matre, totus Deus et totus homo, unus idemque Christus, pastor et ovis, temporaliter mortuus, tecum in aeternum vivens; et nobis dixit: Quodcunque petieritis Patrem in nomine meo, dabit vobis; obsecro te, ut des mihi cum eodem Filio tuo te in omnibus benedicere et glorificare; quia [0977C] quorum est una substantia, unum et datum: des etiam mihi per illum et cum illo peccatorum omnium veniam, et mandatorum tuorum custodiam; dilectionem tuam et fraternum amorem; contra diabolum fortia arma, et erga fratres perfectam charitatem. Amen.
AD FILIUM.
Ex Manual. fol. 34.
Miserere, Domine, miserere, Christe, ut sanctam voluntatem tuam doceas me, ut in charitate tua enutrias me. Tu, misericordia mea, miserere mihi, ut bene rogem te. Miserere, Domine, miserere, Christe, ut dignum me facias exaudiri. Miserere, Domine, miserere, Christe, ut credam in te. Miserere, [0977D] Domine, miserere, Christe, ut cognoscam te, ut sperem in te, et ut diligam te, ut anima mea vivat in te. Amen.
AD SPIRITUM SANCTUM.
Ex Manual. fol. 34.
Miserere, Spiritus paraclitus, consolatio mea, illuminatio mea, miserere, Domine Deus.
ORATIO PRAEPARATORIA AD S. DOMINI PASCHA.
Ex Manual. fol. 2.
Donet mihi Dominus Deus timorem et poenitentiam, spem et amorem; auferat a me fermentum malitiae et nequitiae, et donet mihi continue celebrare Pascha suum in azymis sinceritatis et veritatis.
AD ACCIPIENDUM CORPUS ET SANGUINEM DOMINI ORATIO.
[0978A]
Ex Breviar. ms. S. Joannis Gualberti fol. 1
Domine sancte Pater, omnipotens aeterne Deus, da mihi corpus et sanguinem Filii tui Domini nostri Jesu Christi ita sumere, ut merear per hoc remissionem peccatorum accipere, et tuo sancto Spiritu repleri: quia tu es Deus, et praeter te non est alius, cujus gloriosum nomen permanet in saecula saeculorum. Amen.
POST S. COMMUNIONEM ORATIO.
Ex Manual. fol. 9.
Tibi, Domine, ago laudes et gratias. Custodi, Domine, in me immaculatam fidem. Tibi inclino cervicem. Tibi genua flecto. Te Dominum meum, cum sis unus in S. Trinitate, confiteor. Erue me de periculis. [0978B] Tuere me in omnibus causis. Erige me jacentem, et ea quae explere non possum, quasi sint postulata, concede. Amen.
Ex Manual . . . . . prope finem.
Talem me perpetua defensione concede servare, qualem me fieri per aquam regenerationis, Creator altissime, praestitisti, quia tua gratia redemptus sum.
Ex Manual. fol. 20.
Post decursum vero totius diei spatium cum [ad] lectulos venimus dormitum, votis omnibus rogemus Dominum cum Propheta dicentes: Illumina oculos meos, ne unquam obdormiam in morte. Neque enim melius mortuo dormit qui a vespere usque ad mane obturato ore in laudem Creatoris, non tam somno, quam lethargia depressus, resupinus stetit in lectulo. [0978C] Verum quia contra naturam est insomnem vivere hominem, illum rogemus dormituri, qui non dormitavit neque dormiet, ut satisfaciamus dormientes non voluntati sed necessitati. Canamus propterea coram lectulo Ps. VI: Domine, ne in furore tuo arguas me; congruit enim et rei et tempori. Possunt tamen continuare, sicut placet et non cedit pigritiae, Ps. XII: Usquequo, Domine, oblivisceris me in finem; et Ps. Levavi oculos meos in montes.
Ex Manual. fol. 21.
A facie impiorum, quaesumus, Domine, sub umbra alarum tuarum nos prolege, ut ad laudem tui nominis resurrecturi, te super nos vigilante, securi dormiamus. Per Dominum nostrum Jesum Chritum, [0978D] etc
ORATIO PRO PATRE ET MATRE ET OMNI PARENTELA.
Ex Manual. fol. 9.
Dominator Domine, Deus omnipotens, qui mirabiliter cuncta condidisti et tua dispositione creasti omnia; quia praecepisti dilectionem et honorem circa patrem et matrem exhibere, exaudi me, misericors Deus, clamantem ad te pro genitore meo et genitrice mea.
Ex Manual. fol. 9.
Optimum Domino quinque psalmorum propter tribulationem de percepto gaudio sacrificium. Psal. Exaltabo te, Domine, quoniam suscepisti me. Benedicam Dominum in omni tempore. Jubilate Deo, omnis terra, psalmum dicite nomini ejus. Nisi quia Dominus [0979A] erat in nobis, dicat nunc Israel. Confitebor tibi, Domine in toto corde meo, quoniam exaudisti verba oris mei. Igitur cum pius Dominus dixisset: Invoca me in die tribulationis, et eripiam te; pro ipsa ereptione quaerens a nobis laudis debitum, subjunxit statim: Et honorificabis me. Ergo cum in tentationes varias inciderimus, vel falsorum fratrum, vel saevientium daemonum, contra hostes illos divini verbi jacula intorquentes, cum illos defecisse et nos convaluisse viderimus, mox pura nostri cordis intentione oculos manusque levantes ad coelum in voce laudis et confessionis benedicamus illi, qui misit de coelo et liberavit nos et dedit in opprobrium conculcantes nos, dicamus illi concordante corde et ore ps. Exaltabo te, Domine, quoniam suscepisti me, etc.
[0979B] Docent nos SS. prophetae suis imitabilibus exemplis praevenire faciem Domini mane orationibus nostris. Et David quidem: Et mane oratio mea praeveniet [0980A] te. Isaias autem sic: Anima mea desideravit te in nocte, sed et spiritu meo in praecordiis meis de mane vigilabo ad te. Cum his ergo tribus congruentissimis psalmis vigilet ad Dominum mane et spiritus noster, oremusque in ortu surgentis aurorae, ut a luce prima in vesperum sint oculi ejus super nos, et aures ejus in preces nostras, nostrosque dirigat gressus in viam pacis, ut absque errorum scandalo gradientes, non dominetur nostri omnis injustitia. Hos ergo canamus in ipso diei initio psalmos: Verba mea auribus percipe, Domine. Clamavi in toto corde meo, exaudi me, Domine. Domine, exaudi orationem meam, auribus percipe obsecrationem meam, etc. Oratio Dominica. Credo. Symbolum S. Athanasii: Quicunque vult salvus esse. Litaniae, [0980B] etc. Et quidam V\ ex psalmis cum canticis, etc. Finit.
[NOTA.]
[0979]
An praedictae preces sint sancti Joannis Gualberti autographae, an ab eo collectae ac ab altere descriptae, aut ab illo tantum usurpatae, hactenus me latet. Saltem ob antiquitatem et sanctissimi Viri usum nobis sunt venerandae. Si mihi Manuale istud videre contigisset, facile potuissem discernere, propria ejus manu expressum, et instrumento anni 1072 subnotatum, invenerim apud Franchium lib. XII, pag. 489. Non ingratum fore arbitror, si palaeophilis hanc subscriptionem hic exhibeam.